• Search for:
    27Jun, 2024
    ЭС АЛУУДАН ЭПКИНДҮҮ ЭМГЕККЕ!

    НМКнын 6 окутуучусу, 1 техникалык кызматчысы жана 1 админстративдик кызматкери кесиптик бирликтин (профсоюз) мүчөлүк акы фондунун эсебинен толук каржыланып, 8-9-июнь күндөрү Казакстандын Алма-Ата шаарына тур менен барып эс алып келишти. Эсте каларлык эс алууну Fun-trip туристтик компаниясы жогорку деңгээлде уюштуруп берди. Алгач эле 2500дөн ашык түрдөгү жаныбарларга камкордук көрүлгөн Алма-Атанын белгилүү зоопаркы ажайып турдун көркүн ачты. Эбегейсиз аянтты ээлеген М.Горький атындагы парк, “Достук”, “Мега” соода комплекстери, Нур-Тау айнек шаары, атактуу “Медео”, жаратылыш койнундагы Шум-Булак. Көк-Төбенин чокусунан Алма-Атанын панорамасы алакандай салгандай көрүнүп, Ала-Тоонун аскар тоолорун элестетти. Айтматовдун “Бороондуу бекетиндегидей” катар-катар станцияларга алып жөнөгөн метро менен экспресс-поезддер аркылуу жер астындагы шаардын жашоосун көргөнгө да мүмкүнчүлүк болду. Эс алуудан кийин боордош элдин эски баш калаасы жапжашыл шаар жана жаңы көп кабаттуу асман тиреген үйлөрү менен жан-дүйнөгө жагымдуу таасирлерди калтырды. Ошентип “Мейманчылаган жакшы, бирок мед.колледжибизде андан жакшы”-деген эс алуучулардын тамаша-чыны аралаш сөздөрү менен өзгөчө эмоциялардын толкунунда туулган жерге карай сапар уланды.

    17Jun, 2024
    Эрте аныктоо – өмүр сактоо

    Биздин Нарын медициналык колледжинин эки окутуучусу, Абдыразакова Ж.Д. жана Шаршенова У.А., жатын моюнчасынын жана эмчек рагынын эрте аныктоо боюнча уникалдуу окуудан ийгиликтүү өтүштү. Бул маанилүү курс “Чек арасыз дарыгерлер” (MSF) эл аралык уюму тарабынан жана Кыргыз мамлекеттик медициналык академия менен биргеликте уюштурулган.

    Окутуучулар 36 сааттык теориялык курсту ийгиликтүү аяктап, жатын моюнчасынын жана эмчек рагынын эрте аныктоону үйрөнүштү. Андан соң, студенттерди жана медайымдарды окутуу укугуна ээ кылган 40 сааттык дагы бир тренерлик курсту ийгиликтүү бүтүрүштү. Бул курстар Берлинден келген “Чек арасыз дарыгерлер” (MSF) уюмунун гинекологу, доктор Жан Калибуши Бигирман тарабынан окутулду.

    Бул тажрыйбанын натыйжасында биздин окутуучулар азыр студенттерди жана медайымдарды окутууга даяр. Бул курс биздин колледждин билим берүү сапатын жогорулатууга жана медициналык тармакта күчтүү адистерди даярдоого чоң салым кошууга өбөлгө болот.

    8Jun, 2024
    МЭРДИН КУБОГУ 2024
    ЖАЛКЫБЫЗ ЖАЛПЫБЫЗ ҮЧҮН, ЖАЛПЫБЫЗ ЖАЛКЫБЫЗ ҮЧҮН! Саламаттыкты сактоо жана сергек жашоонун синоними болуп эсептелген спорт дүйнөсүндө да биздин окуу жайдын орчундуу орду бар деп айтсак жарашат.  «Билими күчтүү миңди жыгат, билеги күчтүү бирди жыгат» деген элдик накыл кептин таразасын тең салмакта кармоого ар дайым аракет кылып келе жаткан окуу жайыбыздын спортчулары бул күнү маанилүү мелдештин майданына күч сынашып чыгышты. Эсте каларлык дагы бир күн жөндөм менен шыктын, шамдагайлык менен шайма-шайлыктын, биримдик менен ынтымактын туусу астындагы сынак болду.  Натыйжада биздин Нарын медициналык колледжинин спорт командасы 2024-жылдагы Нарын шаарынын мэринин кубогундагы байгелүү орундарга жетишти. Спорттун каармандарын окуу жайдын атынан оңой-олтоң колго илине бербеген татыктуу жеңиштери менен чын дилден куттуктайбыз! Нарын шаарындагы саламаттыкты сактоо тармагы боюнча онго жакын мекеме-ишканалардын катышуусундагы бул спорттук мелдеш кызуу жүрдү.  Биздин студенттер мыкты чеберчиликти жана командалык биримдикти көрсөтүү менен төмөндөгүдөй байгелүү орундарга ээ болушту: – Аялдар арасында волейбол боюнча 1-орун – Аялдар арасындагы баскетбол боюнча 3-орун – Эркектер арасында волейбол боюнча 3-орун Жалпы командалык мелдеште биздин колледждин кыз-келиндер командасы ардактуу 2-орунду татыктуу оюн менен ээлешти! Арийне, биз спортчуларыбыз менен сыймыктанабыз жана баардык колдоо көрсөткөндөргө, сүрөөнчүлүк жана күйөрмандык кылган үчүн терең ыраазычылык билдиребиз!  Жаңы жеңиштерге карай «жалпыбыз жалкыбыз үчүн, жалкыбыз жалпыбыз үчүн алга!»  деген ураанды таштоо менен окуу жайыбызды спорт жана билимдин Олимпине, жеңиштердин Ала-Тоосуна, академиялык жетишкендиктер менен жашоонун ар тармагындагы албан-албан ийгиликтердин Теңир-Тоосуна жетишүүсүнө тилектешпиз!   #НарынМедКолледжи #МэрКубогу2024 #Спорт #Жеңиш #Командалык дух
    7Jun, 2024
    САГЫНЫЧТУУ САЛАМ САГА, ОКУУ ЖАЙЫМ!

    (07.06.2024)Бүгүн Нарын медициналык колледжинде аталган окуу жайды мындан 30, 20, 15 жана 10 жыл мурун аяктаган бүтүрүүчүлөрдүн эсте каларлык жолугушуусу жагымдуу маанайда өттү.

    Биздин администрация тарабынан уюштурулган бул иш чара чыныгы эскерүүлөрдүн жана жолугушуулардын майрамына айланды. Конокторубузду жылуу тосуп алып, аларга чакан концерт уюштурулду.

    Ар бир топтун бүтүрүүчүлөрү жүрөктүн төрүнөн орун алган таасирдүү сөздөрүн айтышты.
    «Чындыгын айтсам, биз мектепти бүтүп-бүтпөй эле бала бойдон келип, ушул окуу жайдан билим жана тарбия алдык. Окуу жайды аяктаган соң үзгүлтүксүз дээрлик 20 жыл бою өзгөчө кырдаалдар кызматын аркалап келе жатам. Ошондо алган билим ушуга чейин өз үзүрүн берип келе жатат. Бирок бул тармакта эмгектенүү оңой эмес. Анткени күтүлбөгөн оор кырдаалдар болот, темирдей тартип талап кылынат, адамдын ден соолугу эле эмес, өмүрү таразага коюлат. Андыктан училищадан (ал кезде колледжд статусун ала элек болчу) алган билимибиз жана көндүмдөр көп пайдасын тийгизди. Биз ыраазыбыз» – деди “Дарылоо иши” адистигинин бүтүрүүчүсү Байтемир Турдукожоев.

    Бүтүрүүчүлөрдүн көбү өз тармагында иштешет жана колледждеги билими аларга квалификациялуу адис болууга жана инсан катары калыптанууга кандайча жардам бергени үчүн ыраазычылыгын билдиришти. Өз адистиги боюнча түз иштебеген айрым бүтүрүүчүлөр да колледжден алган билимин жана тарбиясын жогору баалай тургандыгын баса белгилешти. Колледжди аяктагандан кийин медициналык академияда окуусун улантып, дарыгер болуп, ушул тармакта азыр да ийгиликтүү иштеп жаткандар бар экени сыймыктандырат.

    Ошол жылдардагы кураторлор А.Шамеева У.Д.Шырдакова жана азыркы учурда колледждин директору Т.Б.Арпачиевага алкыш сөздөр айтылды. Бүтүрүүчүлөр куру алакан келбей, колледжге ыраазычылыктарын билдирип, гүлдестелерин сунуп, колдоо көрсөтүштү.

    Кабыл алуудан кийин бүтүрүүчүлөргө колледж боюнча экскурсия уюштурулду. Бул жылдар аралыгында болуп өткөн өзгөрүүлөргө баары кубанышты. Алар жакшыртылган шарттарга суктанып, колледжден алган билими үчүн жылуу каалоо-тилектерин айтышты.

    Бүтүрүүчүлөрүбүзгө колдоо көрсөтүп, бүгүнкү жолугушууга катышкандыгы үчүн терең ыраазычылык билдиребиз. Унутулгус күн жана жарык маанай, жаркын жүздөн күлкү чачыраган бул жолугушуу үчүн баарына чоң рахмат айтмакчыбыз!
    #Бүтүрүүчүлөржолугушуусу
    #Нарынмедициналык #колледжи #Ностальгия #Эстеликтер #Колледжгеколдоо

    5Jun, 2024
    Саламаттык сактоонун сапаты – дени сак коомдун башаты

    🗓 24.06.24-24.06.05 Талдыкорган жогорку медициналык колледжинин окутуучулары (Казакстан) Кыргызстандын пилоттук медициналык колледждериндеги кесиптештери менен тажрыйба алмашуу жана квалификациясын жогорулатуу максатында Бишкекке иш сапары менен келишти. Иш сапардын программасы төмөнкү темаларды талкуулоону камтыды:

    • “Медайымдар иши” адистиги боюнча кадрларды даярдоо;

    • Прикладдык бакалавр даражасын киргизүү; 

    • Бейтаптын коопсуздугу;

    • Коомдук иштер

    • Изилдөө принциптери;

    • Медайымдык иш кагаздары

    Аталган семинарга 5 пилоттук колледждин мугалимдери, анын ичинде Нарын медициналык окуу жайынын окутуучулары: Ч.Э.Чукукова, Мамытбекова Г.И. жана Жакыпов А.С. катышып келишти. Биздин окуу жайдын жогорудагы окутуучулары бул окуудан ийгиликтүү өтүп, сертификаттарга ээ болуп кайтышты. Бул иш сапар кызматташтыкты чыңдоо жана биздин өлкөлөрдөгү медициналык билим берүүнүн сапатын жогорулатууга багытталган.

    Нарын медициналык колледжи өлкөнүн саламаттыгына орчундуу салым кошууда омоктуу иштери аркылуу ар бир кадамына кылдат мамиле кылып, өз кадрларын өстүрүүнүн үстүндө талыкпай аракеттерди жасап келе жатат.