• Найти:
    1Дек, 2024
    БАҢГИЗАЗАТ БАЯНДАМАСЫ

    Нарын медициналык колледжинде баңгизаттар боюнча түшүндүрүү лекциясы өттү

    Нарын медициналык колледжинде Нарын бажы кызматынын контрабанда жана бажы эрежелерин бузуу менен күрөшүү бөлүмүнүн башчысы Иманкулов А.У. жана опер кызматкерлери Мундузов Б.З., Мусаева М.А. студенттер менен жолугушуп, баңгизаттар тууралуу кеңири маалымат беришти.

    Жолугушуунун жүрүшүндө төмөнкү темалар талкууланды:
    • Баңгизаттарды ташуу ыкмалары жана контрабанданын коркунучтары;
    • Баңгизаттардын түрлөрү, алардын кесепеттери жана дүйнөлүк статистика;
    • Аптекадан сатылган синтетикалык наркотикалык заттар жана алардын зыяны;
    • Баңгизатка көз карандылык жана анын алдын алуу жолдору.

    Ошондой эле, адистер келечектеги медицина кызматкерлери бул дары-дармектерге күнүмдүк ишинде кезигиши мүмкүн экенин белгилеп, алардын таасири жана кооптуу жагдайлары тууралуу маалымдуу болуу зарылдыгын баса көрсөтүштү.

    Студенттер лекцияга активдүү катышып, суроо-жооп форматында талкуулар өткөрүлдү. Иш-чара жаш адистердин билимин кеңейтип, коопсуздук чараларын өздөштүрүүгө көмөк көрсөтөт.

    #НарынМедколледжи #ТүшүндүрүүЛекциясы #Баңгизаттар #БажыКызматы #МедицинаКызматкерлери

    1Дек, 2024
    СПИД: Сабаттыктан саламаттыкка

    СПИД:
    Билим – сенин коопсуздугуң,
    Дарылануу – сенин ден соолугуң!

    1-декабрь Бүткүл дүйнөлүк СПИДге каршы күрөшүү күнүнө карата Нарын облустук кан аркылуу жугуучу вирустук гепатитти жана АИВ көзөмөлдөө борбору тарабынан уюштурулган бүгүнкү иш-чарада биздин Нарын Медициналык Колледжи мыкты даярдыгы жана чыгармачылыгы менен өзүн көрсөтүп, биринчи орунга татыктуу болду!

    Иш-чарада Нарын облусундагы төмөнкү окуу жайлар жана мекемелер күч сынашты:
    • Нарын педагогикалык колледжи
    • №87 кесиптик лицей
    • Нарын облустук үй-бүлөлүк медицина борбору
    • Нарын облустук бириктирилген ооруканасы
    • Нарын облустук кургак учукка каршы күрөшүү борбору
    • Нарын кан куюу борбору

    Биздин санбюллетень заманбап санарип форматында сунушталып, анын мазмуну, дизайны жана жеткиликтүүлүгү өзгөчө жогору бааланды. Бул санариптик ыкма аркылуу ВИЧ/СПИД боюнча маанилүү маалыматтарды студенттерге жана конокторго кызыктуу жана түшүнүктүү форматта жеткирдик.

    Иш-чаранын жүрүшүндө флешмоб да зор кызыгууну жаратты. Биздин студенттер чыгармачылык демилге жана активдүүлүк көрсөтүп, ВИЧ/СПИДдин алдын алууга арналган маанилүү билдирүүлөрдү флешмоб аркылуу жеткиришти. Ар бир кыймыл ден соолукту сактоо жана сергек жашоо образын жайылтууга багытталды.

    Калыстар тобунун курамы:

    • Нарын облусунун ыйгарым укуктуу өкүлүнүн орун басары
    • Нарын шаарынын мэриясынын өкүлү
    • Саламаттыкты сактоо тармагынын профсоюз комитетинин өкүлү
    • Саламаттыкты сактоо координатору

    Жеңишке жетүү – бул чоң эмгектин жана биримдиктин натыйжасы! Биздин студенттердин жана окутуучуларыбыздын креативдүүлүгү жана талыкпас эмгеги ийгиликке алып келди. Бул ийгилик – жаңы долбоорлордун жана демилгелердин башталышы гана.

    Эгерде биздин флешмобдун толук версиясын жана санбюллетенди көргүңүз келсе, комментарийге “+” белгисин калтырыңыз!

    #НарынМедициналыкКолледжи
    #СанарипИнновациялар
    #СПИДгеКаршыКүрөш
    #Жеңиш
    #БизБирге

    18Ноя, 2024
    Арстанбек Буйлаш уулуна арналган адабий кече

    Нарын медициналык колледжинде китепкананын жетекчиси Артыкбаева Жылдыз жана кызматкери Камазбекова Жыпара тарабынан улуу акын Арстанбек Буйлаш уулунун өмүр жолуна жана чыгармачылыгына арналган конференция жана “Арстанбек алп саптар” аттуу көркөм окуу, поэзия сааты болуп өттү. Иш-чарага колледждин студенттери кеңири катышып, акындын өмүрү жана чыгармачылыгы тууралуу баяндамалар окулуп, поэзиялык чыгармалары көркөм окулду. Ошондой эле, видео слайддар көрсөтүлүп, Арстанбектин дастаны комуздун мукам коштоосунда аткарылды.

    Бул маданий иш-чара Президенттин инсанды руханий-адеп ахлактык жактан өркүндөтүү жана дене тарбиясын өнүктүрүү боюнча жарлыгына ылайык уюштурулуп, студенттердин улуттук адабиятка болгон кызыгуусун арттырып, руханий баалуулуктарды тереңирээк түшүнүүгө шарт түздү.

    Читать далее

    8Окт, 2024
    Улууларга кам көрүү

    «Улууларга көңүл буруу жана кам көрүү» айлыгы жыйынтыкталып, аталган кайрымдуулук иш-чарасы 1 жумага созулуп, натыйжада Нарын шаары боюнча 20 адам камтылды.
    НМКнын 4-курсунун “Дарылоо иши” тайпасынын студенттери жигердүү катышып, белек-бечкектер алынган каражаттардын жалпы суммасы 10 миң сомду түздү. Ден соолукка кам көрүүдө мезгил-мезгили менен кан басымын ченеп туруу жана кандын курамындагы канттын деңгээлин текшерүү да маанилүү болгондугун баса белгилеп кетүүгө болот. ❤
    Дагы бир жолу берешендиктин өрнөгүн көрсөткөн демөөрчүлөрүбүз “Нарынбек” соода дүкөнүнө жана “Ализа Бек”эмерек цехине терең ыраазычылык билдирүү менен, чың ден соолук, үй-бүлөлүк бакыт-таалай каалап, таман акы, маңдай тери менен тапкан кирешелерине береке тилейбиз
    #УлууларгаКамКөрүү #СоциалдыкАкция #МедициналыкКолледж #Студенттер #ДенСоолук #Колдоо

    5Окт, 2024
    Ак халатчандар жөө жүрүштө

    5-октябрь күнү Нарын медициналык колледжинин 40 студенти ак халаттарын кийип, Нарын шаарында өткөн жөө жүрүшкө катышты. Бул иш-чара Кыргыз Республикасынын Президентинин Нарын облусундагы ыйгарым укуктуу өкүлүнүн буйругуна ылайык, кырсыктардын тобокелдигин азайтуу боюнча иш-чаралардын алкагында уюштурулган. Жөө жүрүштүн максаты – коомчулуктун кырсыктарга каршы турумдарын күчөтүү жана алдын алуу чараларын кеңири жайылтуу болду. Биздин студенттер бул маанилүү иш-чарага активдүү катышып, жарандык жоопкерчилигин көрсөттү.

    1Окт, 2024
    УЛУУ КӨЧТҮ УЛАП

    УЛУУЛАРДЫН НУГУ МЕНЕН ЖАШТАРДЫН ЖОЛУ КЕНЕН
    Жашоонун жаркыраган дагы бир күнү биздин колледждин улук мугалимдери жана аксакалдары менен мааниси да, шааниси да артып турду. Улуу муундун устаттары окуу жайдын назарынын борборунда болушту. Октябрь айынын башында белгилене турган Эл аралык Карылар күнүнүн урматына студенттер жана администрациянын жаш мугалимдери кадырман карыяларыбызды чын дилинен куттукташты. “Улууга урмат, кичүүгө ызаат” деген алтын эрежени ыйык туткан кыргыз эли кылым карытып, ушуга окшогон асыл баалуулуктар менен кыйла элден өзгөчөлөнүп турганы тарыхтын таразасында так өлчөнүп келет. Улуу муундун кадырмандарына чың ден-соолук каалап, колледжге сиңирген эмгектерине терең ыраазычылык билдиришти. Майрамдык маанайды коштоо үчүн чогулгандар чай үстүндө даам сызып, атайын портреттер жана ысымдарына арналган ырлар тартууланды.
    Насааты менен наркын сактаган, ак эмгек жана бийик аброю менен окуу жайдын ишеничин актаган бул кадырлуу муун ар дайым күч-кубат, акылмандык жана мээрим менен жаштарды тарбиялап келишет. Алардын мол тажрыйбасы жана ак мээнети баа жеткис. Кадырман мугалимдерибизге ден-соолук, бакубат жашоо каалап, келечекте да бизди шыктандырып жүрө беришин каалайбыз.