• Найти:
    24Апр, 2026
    KOICA өкүлдөрүнүн иш сапары

    Нарын медициналык колледжинде KOICA ыктыярчылар программасынын өкүлдөрү менен жолугушуу болуп өттү.

    Колледжге таанышуу жана мониторинг жүргүзүү максатында ыктыярчылар программасынын координатору Мисс Пэк Хэсон жана программалык менеджер Мээрим Макиева келишти. Жолугушуунун жүрүшүндө алар колледждин администрациясы жана окуу жайдын ишмердүүлүгү менен таанышып, ыктыярчы Ан Ынгёльдүн жүргүзүп жаткан ишмердүүлүгүнө баа беришти.

    Мындан тышкары, жолугушууда аткарылып жаткан иштердин жыйынтыгы, ыктыярчынын билим берүү тармагына кошуп жаткан салымы жана мындан аркы кызматташуу маселелери талкууланды. Колледждин администрациясы KOICA уюмуна колдоо көрсөтүп, эл аралык кызматташтыкты өнүктүрүүгө кошкон салымы үчүн ыраазычылык билдирди.

    Мындай жолугушуулар тажрыйба алмашууга, өнөктөштүк байланыштарды чыңдоого жана студенттер менен окутуучулар үчүн жаңы мүмкүнчүлүктөрдү түзүүгө өбөлгө түзөт.

    21Мар, 2026
    Нооруз – жаңылануунун, үмүттүн майрамы

    Нооруз майрамын утурлай Нарын медициналык колледжинде өзгөчө шаңга бөлөнгөн, улуттук духка сугарылган майрамдык иш-чара өткөрүлдү.

    Колледждин аймагында ак өргөө — боз үй тигилип, айлана жыпар жыттуу даамдарга, шаңдуу күлкүгө жана ак тилектерге толду. Улуттук кийимчен студенттер менен окутуучулар майрамга өзгөчө көрк берип, кыргыз элинин салтын даңазалашты.

    Салтка ылайык сүмөлөк кайнатылып, казандын башында ак ниет, жакшы тилектер айтылып, ар биринин жүрөгүндө үмүт жанды. Таңдан кечке чейин кайнап, түн ичинде бышкан сүмөлөк — берекенин, биримдиктин белгиси болуп, эртең менен баары менен бөлүшүлдү.

    Кечкисин жайылган дасторкондо улуттук даамдар коюлуп, орозо кармаган жамаат менен бирге ооз ачар берилип, ынтымак менен бир туугандык дагы бир ирет даңазаланды.

    Бул майрам — муундан муунга өтүп келген ыйык салттардын жанданып, жүрөктөрдү жакындаткан өзгөчө күн болду.

    Нооруз – ар бир үйгө береке, ар бир жүрөккө жылуулук алып келген улуу майрам!

    28Фев, 2026
    Практикалык сабак: Балдар арасында санитардык билим берүү

    «Ден соолукту чыңдоо жана санитардык агартуу» дисциплинасынын алкагында окутуучубуз Нуркасымова Б. 2-курстун «Медайымдык иш» адистигинин студенттери менен биргеликте практикалык сабакты өзгөчө форматта өткөрүштү.

    Бул жолу сабак теория менен гана чектелбестен, балдар бакчасындагы кичинекей бөбөктөргө санитардык агартуу жүргүзүү аркылуу уюштурулду. Студенттер:

    – Колду туура жууунун ыкмаларын

    – Тишти туура тазалоонун жолдорун

    – Тиштерге пайдалуу жана зыяндуу жемиштерди

    көрсөтмөлүү куралдар аркылуу, оюн форматында түшүндүрүштү. Бөбөктөр активдүү катышып, кызыгуу менен жаңы маалыматтарды кабыл алышты.

    Сабактын темасы: Мектепке чейинки жана мектеп жашындагы балдар арасында санитардык агартуу иштерин жүргүзүү.

    Мындай практикалык сабактар студенттердин кесиптик чеберчилигин арттырып, коом менен иштөө тажрыйбасын байытат. Ал эми бөбөктөр үчүн бул – ден соолукка пайдалуу адаттарды эрте калыптандыруунун маанилүү кадамы.

    Алдыда студенттер башка темалар боюнча да ушундай форматта иш алып барып, дагы башка бала бакчаларды жана мектептерди камтууну пландап жатышат.

    Мындан ары ушундай пайдалуу жана кызыктуу иш-чараларды «Сабак чөйрөсү» рубрикасы аркылуу бөлүшүп турабыз.

    #НарынМедКолледжи #СанитардыкАгартуу #ДенСоолук #СестралыкИш #ПрактикалыкСабак #Сабакчөйрөсү

    https://youtube.com/shorts/NhSuYtazpsw

    ?si=ezS6I42zSKA5c0GI

    3Фев, 2026
    Окутуучулардын квалификациясын жогорулатуу максатындагы стажировка

    Методикалык бөлүмдүн сунушу жана талаптарына ылайык, биздин окуу жайдын окутуучулары ар үч жылда бир жолу стажировкадан өтүп турушу керек. Бул талап окутуучулардын кесиптик деңгээлин жогорулатууга жана билим берүү процессин заманбап стандарттарга ылайык жүргүзүүгө багытталган.

    Аталган талаптын алкагында бир катар окутуучулар төмөнкү багыттар боюнча стажировкадан өтүштү:
    • медайымдык иш;
    • реанимация жана хирургия;
    • офтальмология жана отоларингология;
    • фармацевтикалык химия;
    • терапия жана башка клиникалык багыттар.

    Стажировкадан өткөн окутуучулар: Иманканова К., Дөөтова З., Алмазбеков А., Касканова А., Асанкулова Э., Тынычбекова Г., Болотбекова С..

    Стажировканын жүрүшүндө окутуучулар практикалык ишмердүүлүк менен катар заманбап медициналык аппараттар, ошондой эле жаңы буйруктар, нормативдик талаптар жана иш алып баруунун актуалдуу стандарттары менен таанышып келишти. Бул тажрыйба студенттерге теория менен катар практикага негизделген, сапаттуу билим берүүгө шарт түзөт.

    25Дек, 2025
    Нарын медициналык колледжинде жаңы мүмкүнчүлүктөр!

    Нарын медициналык колледжинде жагымдуу жаңылык орун алды. Колледжде

    гимнастика залы толук оңдоп-түзөөдөн өткөрүлүп,

    ошондой эле балдар массажы үчүн жаңы, өзүнчө кабинет ачылды.

    Буга чейин колледжде жалпы массаж кабинети иштеп келген жана анда массаж боюнча окуу курстары өткөрүлүп келген. Эми ага кошумча катары заманбап талаптарга жооп берген, атайын жабдылган балдар массажы кабинети пайдаланууга берилди.

    Жаңы ачылган окуу кабинети жана гимнастика залы студенттердин практикалык көндүмдөрүн өнүктүрүүгө, билим берүүнүн сапатын жогорулатууга жана ыңгайлуу окуу шарттарын түзүүгө чоң өбөлгө түзөт.

    Бул иштердин ишке ашуусуна салым кошкон бардык жетекчиликке, окутуучуларга жана кызматкерлерге ыраазычылык билдиребиз. Жаңы зал менен кабинеттер келечектеги мыкты медициналык адистерди даярдоого кызмат кыла берсин!

     

    16Дек, 2025
    Студенттерге кам көрүү

    Нарын медициналык колледжинде студенттерге кам көрүү – дайыма көңүл борборунда

    Нарын медициналык колледжинин кураторлору жыл сайын кыш мезгили жакындаган учурда шаарда ижара батирлерде жашаган студенттерибиздин жашоо шарттарын текшерип чыгышат. Бул иш-чаранын негизги максаты — студенттердин коопсуздугун камсыз кылуу, батирлердин жылуулугуна, тазалыгына жана жалпы жашоо шарттарына көз салуу, ошондой эле аларга камкордук көрсөтүү.

    Аталган иш-чара колледждин тарбия иштери боюнча иш мерчемине ылайык, директордун орун басары Темирканова Б.А.нын жетекчилиги алдында уюштурулду. Текшерүү иштери кураторлор жана Нарын облус кызматкерлери менен биргеликте жүргүзүлдү.

    Рейддин жыйынтыгында, шаардагы ижара батирлерде жашаган бардык студенттердин жашоо шарттары жакшы экени, батирлерде жылуулук бар экени жана жашоого керектүү бардык шарттар толук камсыздалганы аныкталды.

    Колледж администрациясы студенттердин билим алуусу менен катар алардын социалдык-тиричилик шарттарына да өзгөчө көңүл бурат. Биздин негизги максатыбыз — ар бир студент өзүн коопсуз, камкор жана ыңгайлуу чөйрөдө сезиши.

    Студенттерибизге кам көрүү — биздин башкы милдетибиз!
    #НарынМедКолледжи #ТарбияИштери #ИшМерчеми #СтуденттергеКамкордук #КураторлорИши #ЖИИ #КышкаДаярдык

    ru_RURU
    ru_RURU kirKY